Потвердзени термин и програмни змист Ружи
30. юн 2021.Дзеци з Ґрачаници у Кули и Керестуре
5. юлий 2021.Вчера, на Гиподроме Леї, у орґанизациї керестурского Конїцкого клубу Русин, отримани ище єдни дринґацки коньски обегованя.
На Гиподроме орґанизовани осем єднозапрагни дринґацки обегованя на 1800 метери, у хторих участвовали конї власнїкох з рижних местох зоз Войводини и Сербиї, а орґанизоване и бежанє за реквалификациї.
За найлєпших були предвидзени погари, а перши штири места у каждей обеговацкей точки достали пенєжни и робни награди.
Богату програму пририхтал Конїцки клуб, а на хторей попри осем дринґацких обегованьох нащивителє мали нагоду видзиц и дефиле парадних запрагох, як и интересантни бависка за дзеци и старших.
Єдини змагатель зоз домашнього клубу бул Янко Планчак, хтори зоз коньом Вихор Ж. М., у трецим кругу змаганя освоєл шесте место, а хторого вожел Владислав Планчак.
И конь Парма Ферм, власнїка Ивана Медєша зоз Керестура, тиж участвовал на дринґацких обегованьох и освоєл високе друге место у шестим кругу змаганя. Иванов конь наступел за Конїцки клуб Бачка зоз Суботици, хторому тренер Моника Кеченович, а вожел го Борис Кеченович.
Змаганю присуствовал и предсидатель Општини Кула, Дамян Милянич, а отримане є под покровительством Општини Кула, з помоцу кереструских ремеселнїкох, поднїмательох, привреднїкох и числених поєдинцох.