„Ружа” ма окремну важносц за идентитет руснацох

У Велькей сали Дома култури у Руским Керестуре отримани Ревиялни вечар у рамикох Фестивала рускей култури Червена ружа, котри спред Министерства за людски и меншински права и дружтвени диялоґ отворела Ґордана Чомич. На тей остатнєй програму тогорочного Фестивалу присутна була и державна секретарка у тим министерстве Олена Папуґа, предсидатель Националного совиту Руснацох Борислав Сакач, предсидатель Вивершного одбору НС Желько Ковач, директорка Основней и штреднєй школи зоз домом школярох Петро Кузмяк Наталия Будински и други.

Чомичова привитала шицких присутних на руским язику и назначела же очуванє идентитета єдного народа нє значи лєм пестованє писнї и танцу, алє вира до очуваня свойого язика, култури и заєднїцкого нашлїдства котре ше дзелї з другима. Прето 60 роки Фестивала рускей култури ма окремне значенє у очуваню идетитета рускей заєднїци.

На концу приємней бешеди министерка наглашела же є нє першираз, а напевно анї нє остатнїраз на Червеней ружи, и закончела зоз словами: „Най жию Руснаци!”

Ревиялни вечар – ретроспектива 60 Червених ружох

Зоз Ревиялним вечаром – ретроспективу 60 Червених ружох, вчера у Велькей сали Дома култури означена 60. рочнїца нашого найстаршого Фестивалу култури и закончена тогорочна ювилейна Червена ружа 2021.

Фестивал привитала присутна министерка за людски и меншински права и дружтвени диялоґ Ґордана Чомич, а присутна була и єй секретар Олена Папуґа, предсидатель Националного совиту Руснацох и його Вивершного одбору Борислав Сакач и Желько Ковач и директорка Школи Петро Кузмяк Наталия Будински.

У програми ше здогадло на 12 ружово шпиванки у народним духу, од вецей авторох, починаюци од снователя Ружи Якима Сивча. Виведли их нашо млади шпиваче хтори за собу уж маю числени наступи, а велї з нїх праве на Ружи достали награди за найкрасши дзивоцки и леґиньски глас. Наступели дует Марина Роман и Кристина Афич, Александар Планкош, Мирослав Малацко, Марко Буила, Виктор Хрин, Дарина Михняк, Павле Венчельовски, Валентина Салаґ, Катарина Кочиш, Борис Маґоч и Александра Русковски.

Шпивачох провадзел Вельки народни оркестер Дому култури Руски Керестур под руководзеньом Мирка Преґуна. Оркестер на концу тиж виведол даскельо шпиванки, а Фестивал започал и закончел зоз нєурядову гимну Фестивалу Ружи, червени ружи.

Док були виводзени шпиванки, на видео биму на бини ше зменьовали 222 фотоґрафиї у фото-ретроспективи зоз шицких прешлих 60 Фестивалох, хтори пририхтал наш познати фотоґраф и новинар Любомир Дудаш Инґе. Менша часц тє. 120 од тих фотоґрафийох, зложена и до окремней вистави хтору през остатнї два фестивалски вечари мож було опатриц у голу Дому култури.

Руководителька ретроспективного вечара була Андреа Надь хтора вєдно зоз Андрейом Оросом водзела и конферансу хтору зложела Мая Зазуляк Гарди.

И остатнього фестивалского вечара у дворе Школи Петро Кузмяк за шицких учашнїкох и публику орґанизоване дружтвованє з музику.

Тогорочни Фестивал орґанизовал Дома култури Руски Керестур, а финансийно го потримали Општина Кула, Национални совит Руснацох, Министерство култури и информованя Републики Сербиї и Покраїнски секретарият за културу, явне информованє и одношеня з вирскима заєднїцами.

Найкрасши глас – Дарина Михняк, за цалосни наступ – Александра Русковски

На другим фестивалским вечаре 60. Червеней ружи, кошарку червених ружох и награду за найкрасши глас освоєла Дарина Михняк з Коцура, а за цалосни наступ наградзена Александра Русковски з Руского Керестура.

Михнякова наступела зоз шпиванку Нє можем забуц Златка Русковския у аранжману Мирослава Папа, а Русковскова зоз шпиванку Можебуц дакеди Владимира Малацка за хтору аранжман зробел Мирко Преґун.

У тих двох катеґорийох змагали ше ище и ґрупа Дахто, дацо, даґдзе з Керестура,  Марко Буила з Коцура, Мишана шпивацка ґрупа КУД Жатва Коцур, Антонела Надь з Руского Керестура,  Младша шпивацка ґрупа КПД Дюра Киш зоз Шиду, Мирослав Малацко з Керестура и Дзивоцка шпивацка ґрупа КУД Тарас Шевченко з Дюрдьова. 

Шпивачох провадзел Фестивалски оркестер под руководством Мирослава Папа котри з Мирком Преґуном пририхтали и аранжмани, а Оркестер после змагательней часци наступел зоз трома композициями.

Наступ шпивачох оценьовал жири у составе Геленка Гарвильчак, Златко Русковски и Анамария Регак. Видеа-наяви зробели Златко Русковски и Сенка Русковски Надь, а видео-анимацию Ярослав Планчак. Руководителька манифестациї и авторка конферанси була Мая Зазуляк Гарди, а водителька Валентина Новта.

Други фестивалски вечар на початку програми привитал предсидатель Општини Кула Дамян Милянич, присутна була и державна секретарка Олена Папуґа и представителє Националного совиту Руснацох на чолє з предсидательом Бориславом Сакачом.

Змагательни вечар отримани у Велькей сали Дому култури, знїмала го и Радио-телевизия Войводини, а директни пренос прейґ дружтвених мрежох мож було патриц прейґ видео-биму у школским дворе, дзе после змаганя отримана розвага зоз музику.

Нєшка, трецого фестивалского вечара тиж у Велькей сали Дому култури будзе отримани Ревиялни вечар – Ретроспектива 60 Червених ружох, на котрим буду виведзени 12 композициї у народним духу котри настали на тим нашим найстаршим фестивалу.

Ище єдна вистава у рамикох „Червеней ружи”

Скорей вечаршей програми на другим фестивалским вечаре 60. Червеней ружи у Доме култури, у голу и клубу, присутни могли нащивиц окреме пририхтану виставу фотоґрафийох зоз потерашнїх Червених ружох.

Фотоґрафиї за тот ювилейни Фестивал пририхтал Любомир Дудаш Инґе, наш познати фотоґраф и новинар, а з векшей часци є и автор тих фотоґрафийох.

Нащивителє мали нагоду здогаднуц ше нє лєм главних програмох котри ше уж 60 роки виводзи на Фестивалу, алє и провадзаци програми од котрих уж дзепоєдни и призабути. На фотоґрафийох видно учашнїкох и публику, як и случованя поза бину.

Виставу годно опатриц и скорей нєдзельовей програми, кед у Велькей сали Дому култури будзе отримани Ревиялни вечар – Ретроспектива 60 Червених ружох.

„Червену ружуˮ отворела вистава фотоґрафийох Петра Дешича

Тогорочни ювилейни 60. Фестивал рускей култури Червена ружа почал зоз отвераньом вистави фотоґрафийох автора Петра Дешича, под назву Руски дзивки.

Вистава приказує руски дзивки у автентичним, народним облєчиве, а фотоґрафиї робени у амбиєнталним окруженю у Руским Керестуре, у просторе хтори специфични по тим же ма историйни характер.

Двацец фотоґрафиї виложени опрез будинку Замок, дзешец у Музею, а вистава поставена у рамикох проєкту Дзвери музею Туристичного здруженя Руски Керестур.

Виставу фотоґрафийох “Руски дзивки” финансийно потримала НВУ “Руске слово”, даруюци свой стари папер на рециклажу з Младежского волонтерского кампу Туристичному здруженю Руски Керестур.

Фотоґрафиї, окрем вчера, годно опатриц и нєшка и наютре од 18 по 20 годзин, у школским будинку Замок, а на истим месце и Здруженє женох Байка понука свойо рижни продукти – колачи и сувенири.

Рутенпрес