На соботу X „Днї керестурскей паприґи”
19. авґуст 2022.Першокласнїком од Општини Кула прибор и учебнїки
2. септембер 2022.Туристично-привредно-културну манифестацию „Днї керестурскей паприґи” отворел предсидатель Општини Кула Дамян Милянич, а публику привитал и секретар Месней заєднїци Михайло Пашо.
Милянич у привитним слове повинчовал орґанизатором на витирвалосци у орґанизованю нє лєм того дня, алє и шицких дньох отримованя Паприґияди през дзешец роки. То єден красни ювилей и жадам же би ше манифестация ище роками отримовала. Шицким жадам приємне пребуванє у Руским Керестуре и же би шицки вєдно уживали у єдним таким збуваню – гварел присутним Милянич.
Пред отвераньом, а од вчасного дополадня, отримане змаганє у вареню айвару у рамикох каравану поз назву „Изађи ми на теглу” у хторей треце место завжали кухарки з Руского Керестура, друге место Здруженє женох „Рубац” зоз Кляїчева, а перше продукователє паприґи „Бркич и синове” зоз Крушчичу.
После урядового отвераня ушлїдзела културна програма. Тоту програму отворели члени наймладшей и младшей фолклорней ґрупи котри одшпивали по два шпиванки, а пририхтали их Андреа Штефанко и Кристиян Няради. После нїх наступела Дзивоцка шпивацка ґрупа и Женска шпивацка ґрупа зоз даскелїма шпиванками, котри за наступ порихтала фахова руководителька Еуфемия Планкош. После нїх на бини заграл Народни оркестер „Юлиян Рамач Чамо”, а програму водзел Емил Няради.
У рамикох 10. манифестациї „Днї керестурскей паприґи” того року першираз отримане и окремне змаганє у пририхтованю айвару, як єдно спомедзи двацец у сериялу „Изађи ми на теглу”, медзи Керестурцами пременоване до назви „Виступ ми зоз дунцом”.
Змагали ше вкупно дзевец екипи, медзи котрима три зоз валалу – Маров шпайз познати бренд Мариї Дюрич и єй родичох Нади и Стеву Шикорових, Шестри зоз манастира и Наш домашнї айвар котри пририхтовала фамелия Югас. Потим ше змагали и екипи зоз околних местох, зоз Кули, Крущичу, Кляїчева и Зомбора.
Трочлени жири у составе Олена Виславски, Михайло Фейди и Владимир Олеяр зоз тайним коштованьом одлучел же шпоргет смедеревац за перше место достанє екипа Иван и синове зоз Крущичу, другопласована екипа була Здруженє женох Рубац зоз Кляїчева, а треце место завжали Югасово зоз Керестура под меном екипи Наш домашнї айвар.
Змаганє у вареню айвара тирвало полни шейсц годзини, орґанизаторе сериялу обезпечели шицко потребне, каждей екипи по 25 килоґрами паприґи, як и основни присмачки, та зоз собу принєсли и шпоргети смедеревци дзекуюци котрим цали центер валалу наисце пахнул на печену паприґу и айвар. Шицки змагателє мали право додавац присмачки и состойки по своїм смаку, цо найвироятнєйше и видзелєло найлєпших.
Под час змаганя атмосфера була интересантна дзекуюци водительом котри ше остарали за динамику, нєпреривно нащивйовали кухарох, потим обдумовали рижнородни кратки бависка, та мож повесц же було интересанто и змагательом и публики.
Змаганє у Керестуре отримане перше у тогорочним сериялу, караван надалєй нащиви ище дзеветнац места по цалей держави, дзе ше по истих пропозицийох буду змагац числени други екипи, а потим найлєпши зоз каждого буду вариц ище раз айвар на финалним змаганю у Беоґрадзе.
Традицийни дефиле парадних кочох през центер валала орґанизовал Конїцки клуб „Русин”, и тиж пре хвилю мал менєй учашнїкох як плановене, та ше повожели 6 парадни кочи на чолє зоз шедлачом.
После привиту представительох власци и културней програми, орґанизаторе подзелєли традицийни награди за найкрасшу дзецинску маску, найчежшу паприґу и найкрасши штанд.
У маскенбалу на тему паприґи тиж пре хвилю участвовало менше число дзецох як по други роки, а наградзени перши три маски хлапцох – Матей Афич, Денис Дудаш и Матей Варґа, а од дзивчатох Ана Миладинович, Даниєла Рамач и Кристина Рамач.
За найкрасши штанд вибрани штанд фамелиї Дюру Арвового, найчежшу паприґу од 428 ґрами того року принєсла Марияна Сивч, а наградзени и шлїдуюци штири места, тє. паприґаре цо ше змагали у тей катеґориї.
У парку на штандох и на тот завод було надосц викладачох рижних продуктох, од паприґи и єй преробкох, по овоци, и викладачох з нашеньских и хемийних хижох. Тиж було и предавачох виробкох старих ремеслох, домашнього виробнїцтва и сувенирох.
За нащивительох варело ше вецей файти уж традицийних єдлох од рижних паприґашох, печеня, по капущанїки. Вельке число нащивительох, попри Керестурцох и велїх госцох з околїска и з иножемства, забавял „Пицикато бенд”, а у сали Младежского дому тє. у диску Амадеус отримани успишни концерт сараєвскей ґрупи „Валентино”.