Манифестация „Смаки традициї”

Треци по шоре, Фестивал традицийних руских єдлох Смаки тадициї бул отримани всоботу 1. юния. Подобного змисту як и скорейших рокох, а успишносц потвердзели числени нащивителє.

На краткей, алє удатней културней часци прогами, зоз шпиванками ше представели дзеци зоз музичней оводи дзецинскей заградки Цицибан, наймладша и младша фолклорна ґрупа Дома култури Руски Керестур, як и дует Ана Мария Сопка и Доротея Рамач, а по конєц нащивителє мали нагоду послухац руски шпиванки у виводзеню младого народного бенду у составе – Стефан Колошняї, Борис Жирош и Иґор Папуґа.

Тиж так, на штанду НВУ Руске слово отримана промоция Мацеровей рускей кухарки по сербски, ту могло покоштовац и даскельо стари руски єдла, алє и опатриц як ше вари сирец.

На манифестациї насампредз представени стари руски єдла, уж познати кухаре приготовели свадзебну капусту, свадзебну сарму, капусну мачанку зоз колбасу и капущанїки, алє було и шкварки за коштованє Попри тим, на штандох могло купиц и сладки лакотки, сувенири нашого валалу, як и руски кнїжки.

За наймладших нащивительох орґанизаторе обдумали змаганя у старих руских бавискох, так дзеци скакали у мехох, обеговали ше зоз вайцами на ложкох и правели чардаки зоз чуткох. Тиж так, Любица Нярадийова випровадзела роботню у правеню покерайох.

Орґанизатор Здруженє гражданох Руска скарбнїца, а Фестивал отримани зоз финансийну потримовку Покраїнского секретарияту за образованє, предписаня, управу и национални меншини – национални заєднїци и локалней самоуправи Општини Кула.