Moж уплациц пакецик за Дїда Мраза
10. децембер 2024.
Седмеро рецитаторе иду на Зонску смотру
17. марец 2025.
Зоз гимну Републики Сербиї „Боже правде” и шветочну шпиванку Руснацох у Сербиї „Браца Русини”, котри одграл Вельки народни оркестер Дому култури Руски Керестур „Юлиян Рамач Чамо”, у Клубу 10 Дома култури, вчера, 17. януара означене Националне швето Руснацох у Руским Керестуре.
Ту дзе и шедзиско Националного совиту Руснацох, присутних привитал його предсидатель Йоаким Рац котри шицким повинчовал тот значни датум за нашу заєднїцу. Швето потим повинчовал и предсидатель Општини Кула Дамян Милянич.
У краткей програми наступели дзивоцки дует Анамария Сопка и Доротеа Рамач зоз двома шпиванками як и солиста Мирослав Малацко, а провадзел их Оркестер Дому култури.
На програми котра того року була у зменшаним обсягу и просторе пре обєктивни причини, було красне число присутних, представительох локалней и месней власци, священїки керестурскей и кулскей парохиї, монахинї, представителє валалских институцийох и здруженьох и други гражданє.
Потим у нєформалней часци друженє предлужене з почасценьом з традицийнима рускима єдлами и зоз музику Народного оркестру.
Локалну преславу националного швета орґанизовали Национални совит Руснацох, Дом култури Руски Керестур и Младежске здруженє Пакт Рутенорум (Pact Ruthenorum).
