На „Червеним пупчу” осем нови композициї
30. юн 2025.
На базену положена нова вакумска пумпа, вода будзе швидше прецекац
3. юлий 2025.
Другого вечара 64. Фестивалу рускей култури „Червена ружа” отримани ревиялни наступ руских ансамблох „Одгуки ровнїни” на котрим ше представели културно-уметнїцки дружтва з єденац наших руских местох, попри зоз Сербиї и зоз Републики Горватскей.
Гимну Републики Сербиї „Боже правде” и шветочну шпиванку Руснацох у Сербиї „Браца Русини” на початку одшпивал Мишани хор Дома култури Руски Керестур котри пририхтала Еуфемия Планкош, а провадзел их Народни оркестер „Юлиян Рамач Чамо” под руководством Кристияна Нярадия.
Потим ше численей публики на лєтнєй бини у дворе керестурскей школи „Петро Кузмяк”, з найкрасшима своїма нумерани шпиванкох и танцох представели єденац руски дружтва т.є. члени їх секцийох, од наймладших по ветеранох.
Так наступели нашо аматере з КУД „Петро Кузмяк” з Нового Орахова, зоз КУД „Жатва” з Коцура, зоз КПД „Иван Котляревски” з Бикич Долу, потим зоз КПД „Карпати” з Вербасу, зоз КУД „Др Гавриїл Костельник” з Кули. Наступели и аматере зоз КУД „Тарас Шевченко” з Дюрдьова, зоз Дружтва Руснацох у Суботици, зоз Руского културного центру з Нового Саду, зоз КПД „Дюра Киш” зоз Шиду, з КУД „Яким Ґовля” з Миклошевцох у Републики Горватскей а отамадз пришли и аматере зоз КУД „Яким Гарди” з Петровцох, и домашнї аматере секцийох Дому култури Руски Керестур котри и орґанизатор того нашого найстаршого Фестивалу.
Руководителька манифестациї „Одгуки з ровнїни” була Андрея Штефанко, а конферансу водзели Адриана Надь Барна и Яким Винаї. Вони на початку привитали и визначних госцох, а на концу подзековали на потримовки и вельочисленим спонзором, од державних по приватнїкох найвецей з Руского Керестура.
По законченей програми друженє учашнїкох и публики зоз музику предлужене на пририхтаним просторе коло Спортскей гали, а веселих аматерох забавяли „Коцурски бетяре”.
