Отримани 14. Днї керестурскей паприґи
24. августа 2026.
Вельки народни оркестер Дома култури Руски Керестур, його Хлопска шпивацка ґрупа и солисти, того викенду, 23. авґуста представели ше публики у Словацкей Републики, у месце Збой, дзе отримани пияти Медзинародни „Збойнїцки фестивалˮ.
Фестивал отримани на просторе опрез Културного дому у Збою, як часц програми зоз хторим ше, у тей часци Словацкей, пестує фолклор, традицийна култура и обичаї.
Окремне место на тогорочней програми припадло представнїком Дома култури Руски Керестур, та наступели – Вельки народни оркестер на чолє зоз фаховим руководительом Кристияном Нярадийом, Хопска шпивацка ґрупа и солисти – Мирослав Малацко, Лука Фа и Марко Колошняї. Зоз Руского Керестура участвовали 14 виводзаче.
Хлопска шпивацка ґрупа и солисти одшпивали по даскельо руски традицийни шпиванки, док Оркестер виведол свойо инструментали – Венчик шпиванкох „Ей сущела лїщинаˮ и „Дзе же тота проста дражкаˮ як и шпиванку „Кед я пойдзем маршировацˮ.
Участвованє на таких медзинародних фестивалох представя добру нагоду же би ше културу Руснацох у Войводини, представело публики и звонка Сербиї, алє и же би ше направело контакти зоз другима музичарами, ансамблами, фолклорнима колективами, гварел руководитель Кристиян Няради.
Рутенпрес
