Поздрав паприґи

Днї керестурскей паприґи манифестация пошвецена традициї садзеня паприґи, отримує ше од 2012. року, дзе ше презентую продукователє паприґи, домашнї продукти, рихтанє традиционалних єдлох зоз паприґи, зоз провадзацу културно-уметнїцку и забавну програму.
Єдна од атракцийох то и конїцки обегованя на хиподрому. Найзаслужнєйши за тоту манифестацию то Здруженє продуковательох паприґи „Capsicum Annuum“.
Циль здруженя же би помогло у находзеню ище туньшого репроматериялу за продукцию и предаванє готових продуктох, едукация членох, отримованє рижнох промоцийох и саймох.

Домашнї шпайз

Домашнї шпайз наймладша манифестация хтора збера и представя продуковательох желєняви, домашнєй поживи, меду, палєнки, етно продукти и домашнї продукти и промовує природну, домашню и здраву поживу.
Манифестацию орґанизує найактивнєйше здруженє у валалє, Здруженє женох „Байка“. Здруженє вирабя рижни сувенири и други домашнї продукти, представя роботи своїх членох, зоз чим доприноши промоциї и афирмованю русинскей националней заєднїци.

Костельникова єшень

Културна манифестация „Костељникова јесен“ перши раз орґанизована 1994. року и пошвецена є роботи великана русинскей писменосци и кнїжовносци, дохтора филозофиї Гавриїла Костельника, теолоґа, кодификатора русинкого язика и аутора першей кнїжки уметнїцкей литератури на русинским язику.
Манифестация презентує кнїжовне, научне и ликовне творенє Руснацох, як и творенє младих у рамикох мултимедиялней манифестациї „Дньовка“.